Morð

Kötturinn Ronja kom heim í nótt með glaðning fyrir okkur heimilisfólkið.  Hún skreið inn um gluggann með fugl í kjaftinum og dundaði sér við að murka úr honum tóruna hér á stofugólfinu.  Mér finnst þetta nú hálfviðbjóðslegt, svona í ljósi þess að hér skríður Katla um öll gólf hin sprækasta.  Fuglinn fékk virðulega útför við hæfi.  Hans jarðnesku leifar hvíla nú í plastpoka útí ruslatunnu.  Ég hef lítið vit á dýrafræði og greini jafnilla á milli fugla og bílategunda. En ég held að þetta hafi verið bókfinka, álmkraki eða haförn.

Athugasemdir

[Hafþór H Helgason, 1.5.2007 kl. 15:03]

Ég votta haferninum virðingu mína og megi hann hvíla í friði. Vona að útgjöldin við útförina hafi ekki farið úr hófi fram.

[Jóna Á. Gísladóttir, 1.5.2007 kl. 16:03]

Vá, Ronja hlytur að vera stór kisa. Má ég giska á Skallaörn.

[http://villimadurinn.bloggar.is/ (IP-tala skráð) 1.5.2007 kl. 16:31]

Vil votta fjölskyldu fuglsins samúð mína.

[Herbert Guðmundsson, 1.5.2007 kl. 16:38]

Eftir að hafa íhugað þetta morð gaumgæfilega, liggur fyrir að morðinginn er kötturinn Ronja, myrta flygildið er án efa Spyrðill sem náði ekki lendingu á Lönguskerjum á fjöru og ætlaði eftir það í veiði í Elliðavatni, en hlekktist á. Ég tel víst að búið sé að gera um þetta allt saman skýrslur hjá flugslysanefnd og sýslumanninum í Kópavogi, sem var alveg á nippinu að missa glæpinn.

[Þóra (IP-tala skráð) 1.5.2007 kl. 17:25]

Kötturinn gerir þetta bara einu sinni. Næst fer hann sjálfur í ruslagatið.

[Mundi (IP-tala skráð) 1.5.2007 kl. 18:06]

Ég ætla að giska á strút.

[Kristín Alma Sigmarsdóttir, 2.5.2007 kl. 08:53]

Ef ad hún gerir thetta medan ég er heima, tha myrdi ég hana.

[Ester Júlía, 2.5.2007 kl. 09:00]

Var þetta ekki bara vestræn korpönd?  

[Kári Harðarson, 2.5.2007 kl. 09:34]

Hann Kismundur okkar setti tvo fugla á dyrastafinn í hitteðfyrravor.

Ég kyssti hann á trýnið í þakklæti en henti fuglunum svo lítið bæri á til að særa hann ekki.  Hann fékk rækjur og rjóma í kvöldmat.

Hann hefur ekki séð ástæðu til að færa björg í bú aftur.

[Unz (IP-tala skráð) 2.5.2007 kl. 11:40]

Plís ekki þú líka Sigmar.  Dýr eru leiðinleg en þó skömminni skárri en dýrablogg 

[Steingerður Steinarsdóttir, 2.5.2007 kl. 16:15]

Kötturinn Matti var mikill veiðiköttur á tímabili og færði ævinlega syni mínum afrakstur vel heppnaðra veiðitúra. Drengurinn var ekkert sérlega hrifinn því hann hafði lítið gaman af að þrífa og blóðslettur, fiður og fuglslík fannst honum enn minna skemmtilegt að hreinsa upp. Herbergið hans gekk af þessum sökum í mörg ár undir nafninu Sláturhús 5.

[Ómar Örn Hauksson, 3.5.2007 kl. 01:05]

Kannast við þetta. Um daginn kom kötturinn minn heim með hrossagauk um miðja nótt. Ég náði fuglinum, sem hafði falið sig á bak við draslið sem er heima í stofu. Hann virtist í heilu lagi, reyndar skelkaður mjög þannig að ég setti hann í kattarbúrið og lokaði hann inn í baðherbergi með það í huga að sleppa honum næsta dag. Ég athugaði hann áður en ég fór að sofa og virtist hann bara hinn hressasti. En daginn eftir lá hann dauður í búrinu þannig að hann lenti í ruslatunnunni í staðin fyrir græna grundir Hljómskálagarðs. Annað hvort hefur hann dáið úr sjokki eða innvortis meiðslum. Mig grunar reyndar að sum dýr hafi svona "self destructive" takka inn í sér sem þau nota þegar þau sjá sér enga von.